تبریز شهری شوراسینین عضوو داود امیرحقیان، کوجوار محله‌سینده کی چمنلی فوتبال میدانی و اطرافیندا بیر گوروش زامانی، داها آرتیق ورزش ایمکانلارینین اینکیشافی و شهرلیلرین شهر پروژه‌لرینده ایشتیراکینین ضرورتی اوصولوندا دورماغینی قایتیردی.
“شهریار” خبر سایتیندان وئریلن معلوماتا گؤره، داود امیرحقیان بو میدانین کئچمیش ایللرده همشهری لرله، ۷-جی منطقه بلدیه‌سی و ورزش تشکیلاتی ایله بیرلیکده قورولدوغونو بیلدیره رک، دئدی: “بو میدان لازیملی استاندارتلارا اوْیغون اولاراق تیکیلیب و یاریشما کئچیرمه ک و پولسیز فوتبال مکتبلری آچماق اۆچون یاخشی بیر ایمکان دیر.”
او، علاوه ائده رک وعده وئردی: “میدانین قالان حیصّه‌سینده کیچیک یاشلی اوشاقلار اۆچون داها کیچیک اؤلچولرده یئنی بیر فوتبال میدانی تیکیلجک.”
بو گوروشده داود امیرحقیان ایله یاناشی، تبریز بلدیه سینین ورزش تشکیلاتینین مدیرعامل، ۷-جی منطقه‌نین مالی و ایقتیصادی معاونی میر معصوم سهرابی، حاج علی محمودی و شهر مدیرلریندن بیر گروه ایشتیراک ائتدی.
گوروشون داوامیندا، شورا عضولری کوجوار ساکینلری ایله صمیمی دانیشیقلار ائده رک، اونلارین ایستک لرینی ائشیتدیلر. کوجوار اهالی سی ایسه، خصوصاً یئنی ورزش استادیومونون آچیلماسینی تقدیر ائده رک، تبریزین صنعتی و تولیدی مرکزلریندن بیری اولان بو محله‌یه داها چوخ دیقّت گؤسترلمه‌سینی ایسته دیلر.
